ពលរដ្ឋដែលប្តឹងលោក ខឹម វាសនា ប្រធានបក្សLDP ត្រូវបានតុលាការកោះហៅឲ្យចូលបំភ្លឺ

(ភ្នំពេញ) ៖ ព្រះរាជអាជ្ញារងនៃសាលាដំបូងរាជធានីភ្នំពេញ លោក ស៊ិន វិរៈ បានចេញដីការកោះអញ្ជើញ លោក សុច សឿង ភេទប្រុស អាយុ៥០ឆ្នាំ ដែលជាដើមបណ្តឹង ឲ្យចូលទៅកាន់អយ្យការ អមសាលាដំបូងរាជធានីភ្នំពេញ នៅថ្ងៃទី២៣ ខែមិថុនា ឆ្នាំ២០១៧ វេលាម៉ោង៨.៣០នាទីព្រឹក ដើម្បីមកបំភ្លឺ។

ករណីកោះអញ្ជើញដើមបណ្តឹង លោក ស៊ិន វិរៈ ឲ្យចូលបមភ្លឺនេះ គឺដំណើររឿងប្តឹង លោកខឹម វាសនា ប្រធានគណបក្សLDP ពីបទជេរប្រមាថជាសាធារណៈ តាមប្រព័ន្ធទំនាក់ទំនងសង្គម(ហ្វេសប៊ុក) ។

សូមបញ្ជាក់ថា ៖ កន្លងមក លោក ខឹម វាសនា ប្រធានបក្សLDP បានជេរប្រមាថពាក់ព័ន្ធនឹង ជាតិ សាសនា ព្រះមហាក្សត្រ នៅលើបណ្តាញសង្គមហ្វេសប៊ុក ការជេរប្រមាថនេះ គឺមិនត្រឹមត្រូវនិងច្បាប់ទេ ជាពិសេសបំពានលើច្បាប់រដ្ឋធម្មនុញ្ញ ដែលជាច្បាប់កំពូលរបស់កម្ពុជា ។
សូមរំលឹកថា៖ នៅក្នុងច្បាប់រដ្ឋធម្មនុញ្ញ ក្នុងមាត្រា ៧.- ព្រះមហាក្សត្រកម្ពុជា ទ្រង់គ្រងរាជ្យសម្បត្តិ ប៉ុន្តែទ្រង់មិនកាន់អំណាចឡើយ។
ព្រះមហាក្សត្រ ទ្រង់ជាព្រះប្រមុខរដ្ឋមួយជីវិត។
អង្គព្រះមហាក្សត្រ មិនអាចនរណារំលោភបំពានបានឡើយ។ មាត្រា ៤៣.-ប្រជាពលរដ្ឋខ្មែរទាំងពីរភេទ មានសិទ្ធិពេញទីខាងជំនឿ។ សេរីភាពខាងជំនឿ និង ការប្រតិបត្តិខាងផ្លូវសាសនា ត្រូវបានរដ្ឋធានាក្នុងល័ក្ខខ័ណ្ឌដែលមិនប៉ះពាល់ដល់ជំនឿ ឬសាសនាដទៃទៀត ដល់សណ្ដាប់ធ្នាប់ និង សន្តិសុខសាធារណៈ។ ព្រះពុទ្ធសាសនា ជាសាសនារបស់រដ្ឋ។មាត្រា ៤.-
បាវចនានៃព្រះរាជាណាចក្រកម្ពុជាគឺ: ជាតិ សាសនា ព្រះមហាក្សត្រ៕(SN-សឺន ជុំសុធន)