លោក សុខ ឥសាន បង្ហាញពីបរិបទនយោបាយនៅប្រទេសកម្ពុជា!

(ភ្នំពេញ) ៖ បើពិនិត្យលើបរិបទនយោបាយនៅស្រុកខ្មែរ ជាពិសេស ចាប់តាំងពីឆ្នាំ ១៩៥៥ មក ប្រវត្តិសាស្ត្រជាក់ស្តែង បានបង្ហាញច្បាស់ថា គឺមានការលូកដៃបញ្ជាពីមហាយក្ស ក្រោមឥទ្ធិពលនៃសង្គ្រាមត្រជាក់ចង់ចាញ់ឈ្នះរវាងប្លុកលោកសេរី និងលោកកុំមុយនីស្ត  នេះជាការលើកឡើងរបស់លោក សុខ ឥសាន។

លោក សុខ ឥសាន អ្នកនាំពាក្យគណបក្សប្រជាជនកម្ពុជា បានអះអាងថា ព្រោះតែ ឆ្លៀតឱកាស បារាំងចាញ់សង្គ្រាមនៅឥណ្ឌូចិន ត្រូវដកថយ សហរដ្ឋអាមេរិក បានលោតចូលមកជំនួសបារាំងភ្លាម ក្នុងផែនការពង្រឹងតំបន់អាស៊ីអាគ្នេយ៍ជាប៉ុស្តិ៍ប៉មជួរមុខ ប្រឈមនឹងលោកកុម្មុយនិស្តរួមមានចិន និង សហភាពសូវៀត ។

លោកបន្តថា ដើម្បីសម្រេចមហិច្ឆតារបស់ខ្លួន សហរដ្ឋអាមេរិក ត្រូវចាប់យក សម សារី ជាមេខ្យល់ធ្វើជារនុកក្នុង ទាក់ទងអូសទាញសម្តេចព្រះនសីហនុ (ព្រះបរមរតនកោដ្ឋ) ឲ្យមកខាងខ្លួន ឃ្លាតឆ្ងាយពីលោកកុម្មុយនិស្ត ដើម្បីយកកម្ពុជាជាប់វៀតណាមខាងត្បូងចូលទៅក្នុងប្លុកសេអាតូ ។

លោកថា ក្រោយពីបរាជ័យផែនការនេះមក ក្រោយ សម សារី រត់ចោលស្រុកទៅរស់នៅឯវៀតណាមខាងត្បូង មហាអំណាចខាងលិចនេះ នៅមានកូនជឹងម្នាក់ទៀសម្រាប់ប្រើ គឺ សម រង្សី ដែលជាកូនរបស់ សម សារី ឲ្យបន្តបុព្វហេតុពីឳពុក ដើរតាមនយោបាយចាស់ក្នុងការពង្រឹងកម្លាំងលោកសេរី នៅក្នុងប្រទេសកម្ពុជា យូរអង្វែងតទៅមុខទៀត ។

ហេតុនេះហើយបានជា សម រង្សី ធ្វើរាល់សកម្មភាពដើរតាមខ្សែបន្ទាត់នយោបាយគូសវាសដោយមេក្លោងធំនៅទិស់ខាងលិចនោះឯង ។ ជាក់ស្តែង មួយម៉ាត់ណាក៍ សម រង្សី យកអាយក្សាមកគំរាមគេឯងដែរ ហើយ រាល់សកម្មភាពរបស់ សម រង្សី គឺដើរតាមការចង្អុលទិសពីមេក្លោងធំនោះជាប្រចាំ ហើយមេធំនេះនៅជួយបន្ទរពីក្រោយរហូត មានទាំងវិទ្យុ ទូរទស្សន៏ អង្គការសិទ្ធិមនុស្ស អង្គការក្រៅរដ្ឋាភិបាលនានា។

អញ្ចឹងហើយបានជា សម រង្សី ទោះបីអត់មានតួនាទីអ្វីសោះក្នុងបក្ស បែរជាអាចត្រូវបានវិទ្យុអាស៊ីសេរីខិតខំរំលេចមុខមាត់ ទាំងខុសច្បាប់បានទៀផង ។

លោក សុខ ឥសាន បានថ្លែងបន្តដូច្នេះថា «ចំពោះសម្តេច ហ៊ុន សែន ដែលមានការគាំទ្រពីមហាអំណាច ចិន រុស្សី ក៏ព្រោះតែមហាអំណាចទាំងពីរ ការពារយុត្តិធ៌ម និងផលប្រយោជន៏នៃប្រទេសទាំងពីរតែប៉ុណ្ណោះ ។

«ជាការយល់ច្រឡំធំហើយដែលវាយតម្លៃថា សម្តេចតេជោ ហ៊ុន សែន និង សម រង្សី បាន នឹងកំពុងលេងល្ខោន ក្រោមការចាត់ចែងពី អ្នកដឹកនាំរឿងតែម្នាក់នោះ ។ មុខមាត់ និងព្រលឹង សម រង្សី គឺជាអាយ៉ងដាច់ថ្លៃរបស់មហាយក្សានៅទិសខាងលិចនេះឯង»៕