ថ្នាក់ដឹកនាំជាន់ខ្ពស់ក្រសួងមហាផ្ទៃផ្តាំផ្ញើរឲ្យថ្នាក់ដឹកនាំខេត្តកំពង់ធំ

ថ្នាក់ដឹកនាំជាន់ខ្ពស់ក្រសួងមហាផ្ទៃផ្តាំផ្ញើរឲ្យថ្នាក់ដឹកនាំខេត្តកំពង់ធំ បំពេញចំណុចខ្វះខាតឲ្យបានគ្រប់ជ្រុងជ្រោយនៅឆ្នាំ២០១៨

ខេត្តកំពង់ធំ៖ឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃថ្លែងថា កន្លងមកខេត្តកំពង់ធំមានការបំពេញភារកិច្ចបានល្អប្រសើរមួយចំនួនធំ ទន្ទឹមនឹងនេះក៏នៅមានចំណុចខ្វះខាត ដែលតម្រូវឲ្យមានការបំពេញបន្ថែមឲ្យបានរួចរាល់ក្នុងឆ្នាំ២០១៨នេះ។

ឯកឧត្តមបានថ្លែងយ៉ាងដូច្នេះក្នុងពិធីប្រកាសចូលកាន់តំណែងរបស់ ឯកឧត្តម សុក ហៃ ជាអភិបាលរង នៃគណៈអភិបាលខេត្តកំពង់ធំ នៅព្រឹកថ្ងៃព្រហស្បតិ៍ ០៣រោច ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៤ ខែមករា ឆ្នាំ២០១៨ ដែលមានការអញ្ជើញចូលរួមពី ឯកឧត្តម លោកជំទាវ ក្រុមប្រឹក្សាខេត្ត អភិបាលខេត្ត អភិបាលរងខេត្ត ព្រមទាំងមន្រ្តីរាជការក្នុងខេត្តពង់ធំប្រមាណជាង៣០០នាក់។ ឯកឧត្តម បន្តថា ខេត្តកំពង់ធំ ក៏មិនខុសពីខេត្តដ៏ទៃទៀតដែរ ដោយការបំពេញភារកិច្ចរបស់មន្រ្តីរាជការនូវ មានភាពខ្វះចន្លោះដែល តម្រូវឲ្យមានការបំពេញបន្ថែមនៅឆ្នា២០១៨។ ក្នុងនោះចំណុចដែលត្រូវបំពេញបន្ថែម គឺត្រូវពង្រឹងលើការបម្រើសេវាសាធារណៈជូនបងប្អូនប្រជាពលរដ្ឋ ដោយពន្លឿនការធ្វើសៀវភៅ (ក២) (ក៤) អត្តសញ្ញាណប័ណ្ណ អត្រានុគោលដ្ឋាន មិនត្រូវប្រកាន់បក្សពួកនិយម និងមានភាពរើសអើងក្នុងកិច្ចសហការណ៍គ្នា ដែលកន្លងមក ប្រជាពលរដ្ឋទូទាំងប្រទេសតែងតែមានការត្អូញត្អែ។ លើសពីនេះទៅទៀតការបង្រាបល្មើសផ្សេងៗជាពិសេស បទល្មើសគ្រឿងញៀន ជលផល និងព្រៃឈើដែលនៅសេសសល់បន្តិចបន្ទួច ត្រូវធ្វើដូចភ្លៀងរលឹមបន្តទៀត។ ក្នុងឱកាសនោះដែរឯកឧត្តម ផ្តាំផ្ញើរទៅកាន់ឯកឧត្តម សុខ ហៃ ដែលត្រូវចូលកាន់តំណែងថ្មីនេះ គឺត្រូវមានកិច្ចសហការណ៍ខ្ពស់ជាមួយ ឯកឧត្តម លោកជំទាវ និងមន្ត្រីរាជការក្នុងខេត្តឲ្យបានល្អប្រសើរ មានស្មារតីខ្ពស់ក្នុងការបម្រើការងារជូនប្រជាពលរដ្ឋ មានកាទទួលខុសត្រូវនូវការបំណែងចែកភារកិច្ចក្នុងការអនុវត្តការងារ មានស្មារតីស្មោះត្រង់ចំពោះរាជរដ្ឋាភិបាល និងប្រជាជន ជាពិសេសហាមដាក់ខាតប្រព្រឹត្តនូវអំពើណាដែល មានជាប់ទាក់ទងនិងបទល្មើសជាដាច់ខាត។

ក្នុងនោះដែរឯកឧត្តម សុខ លូ អភិបាលខេត្តកំពង់ធំ លើកឡើងថា ខេត្តកំពង់ធំមាន ការអភិវឌ្ឍលើគ្រប់វិស័យ ទាំងប្រព័ន្ធហេដ្ឋារចនាសម្ព័ន្ធក្នុងខេត្ត និងជនបទ ប្រព័ន្ធលូរំដោះទឹកភ្លៀងក្នុងក្រុង ការរៀបចំណ្តាប់ធ្នាប់ក្នុងក្រុងមានភាពល្អប្រសើរជាងមុន ការធ្វើប្រព័ន្ធធារាស្រ្តសម្រាប់បង្ករបង្កើនផលស្រូវវស្សា និងស្រូវប្រាំងមានភាពកើនឡើង ការបម្រើសេវាសាធារណៈមានភាពរហ័សដែលអាចឲ្យយើង ទទួលយកបានមួយផ្នែកធំ។ រីឯបទល្មើស ទាំងបទស្លើសនេសាទ ព្រៃឈើ គ្រឿងញៀន និងការមិនគោរពច្បាប់ចរាចរណ៍មានភាពថយជាលំដាប់។ ជាចុងក្រោយឯកឧត្តម ផ្តេជ្ញាចិត្តបំពេញនូវចំណុចសេសសល់ និងអសកម្មឲ្យបាន គ្រប់ជ្រុងជ្រោយនៅឆ្នាំ២០១៨នេះ។